سويت التكميم، أكلك قل ووزنك نزل.
بعد فترة ثبت وزنك أو بدأ يرجع، فقللت أكلك أكثر.
لكن بعدها وصلت لهذا المكان:
وزنك مو عاجبك، وأكلك أصلًا قليل.
هنا تحس إن حلولك انتهت.
فإيش بقي؟
مونجارو، أوزمبيك، وإبر التنحيف.
وتقول:
يمكن هذا هو الشيء اللي أخيرًا بيخليني أوصل.
وهنا بالنسبة لي أنت على وشك تاخذ أسوأ قرار ممكن تاخذه كمكمم.
أنت ما وصلت للإبرة بنفس الجسم اللي بدأت فيه التكميم
من بعد العملية إلى اليوم، غالبًا مر جسمك بفترات طويلة من الأكل القليل، ونقص التغذية، وفقد جزء من العضلات، وقلة الطاقة والحركة.
يعني لو بنستخدم مثال تقريبي فقط عشان أوضح لك الفكرة:
تخيل إنك خلال رحلتك بعد التكميم خسرت 60% من عضلاتك وصحتك العامة وقدرتك الأيضية، يعني قدرة جسمك على الحرق.
وباقي لك 40%.
الحل الصحيح إنك تبدأ ترجع اللي خسرته.
لكن بدل هذا...
تقرر تستخدم الإبرة عشان تدمر الـ40% الباقية.
وهذا مع الأسف اللي يحصل.
الإبر ما راح تبني عضلاتك.
ما راح تحسن تغذيتك.
ما راح تعالج نقص البروتين.
ما راح ترجع لك الطاقة اللي فقدتها.
ولا راح توقف تساقط شعرك أو شحوب وجهك.
لكنها راح تخلي وزنك ينزل فعلًا، يمكن 5 ويمكن 10 ويمكن 15 كيلو.
والأسوأ إنك راح تكون مبسوط وتقول:
أخيرًا لقيت الحل.
طيب، وبعد ما توقف الإبرة؟
هذا السؤال اللي كثير ما يفكر فيه إلا متأخر.
ممكن تستخدمها سنة وتوصل للوزن اللي تبيه، وبعدين توقفها لأنها غالية، أو لأنك وصلت لهدفك، أو لأنك ما تبغى تستمر عليها طول حياتك.
طيب بعدين؟
خلال هذه الفترة ما رجعت عضلاتك، ولا بنيت قدرتك الأيضية، ولا أصلحت أساس المشكلة.
الآن وقفتها.
وزنك راح يبدأ يزيد، واللي يرجع لك غالبًا يكون دهون أكثر، أما العضلات والصحة اللي خسرتها ما ترجع لمجرد إن الوزن رجع.
وهنا تحصل نفسك في وضع أسوأ من البداية.
قبل:
وزنك عالق وأكلك قليل.
الآن:
وزنك يرجع، وأكلك لسه قليل، وعضلاتك أقل، وقدرتك الأيضية أضعف.
وهذي بالنسبة لي أسوأ نتيجة ممكن يوصل لها المكمم.
خلني أبسطها لك بهذا المثال:
طريق مونجارو | طريق استعادة القدرة الأيضية | |
|---|---|---|
وضعك الآن | تأكل 1200 وجسمك يحرق 1000 | تأكل 1200 وجسمك يحرق 1000 |
إيش تسوي؟ | تستخدم الإبر وتقلل أكلك أكثر | تستعيد قدرتك الأيضية |
بعد فترة | تأكل 500 وجسمك يحرق 1000 | تأكل 1700 وجسمك يحرق 2000 |
النتيجة | تنحف لأنك تأكل أقل | تنحف وأنت تأكل أكثر |
بعد 6 شهور أو سنة من الإيقاف | يرجع وزنك ووضعك يصير أسوأ | تحافظ على وزنك وأنت تأكل أكثر |
والسؤال المهم:
أنت إيش تختار؟
وحتى لو اخترت إنك تأكل 500، ترى الـ500 سعرات طفل.
وأنت عشان تعيش حياتك بشكل طبيعي تحتاج أضعافها. فطورك لحاله ممكن يكون فوق 500 لو قدرتك الأيضية طبيعية.
وأنا بالنسبة لي هنا المشكلة كاملة.
لأن المكمم أصلًا ما يحتاج أحد يعلمه كيف يأكل أقل.
هو يعرف يأكل أقل أكثر من اللازم.
لكن الدكتور وصف لي الإبرة
ممكن.
وأنا هنا ما أقول لك إن كل طبيب وصف مونجارو غلط.
إذا الطبيب وصفه لك لسبب طبي واضح مثل السكري أو وجود سمنة مرضية مستمرة، فهذه حالة لها تقييمها الخاص.
لكن غالبًا مو هذا اللي يصير. اللي يصير إن الطبيب يصرفها عشان تنحف وبس.
وأنا أتكلم عن المكمم اللي وزنه صار أعلى من اللي يتمناه، لكنه أصلًا يعيش على أكل قليل وتغذيته وعضلاته متأثرة، ثم يكون الحل المباشر له:
نخليه يأكل أقل.
وهنا أنا أختلف.
لأن بعض الناس، وحتى بعض الأطباء، يصير مقياس النجاح عندهم هو الوزن فقط.
جيت أول زيارة وزنك 90.
رجعت بعد فترة وزنك 80.
خلاص ممتاز.
لكن المهم عندي: إيش اللي خسرته؟ وهل أنت قادر تحافظ عليه؟
بالنسبة لي كطبيب، الرقم لوحده ما يكفيني.
طيب إيش البديل الحقيقي لك أنت كمكمم؟
باختصار:
استفد من تكميمك.
أنت أصلًا عندك أداة قوية جدًا تخلي كميتك الطبيعية أقل من غير المكمم.
المشكلة إنك خلال السنوات خربت المساحة اللي كان المفروض تستفيد فيها من هذه الميزة.
فبدل ما نضيف أداة ثانية تخليك تأكل أقل...
نرجع نبني المساحة.
إعادة بناء القدرة الأيضية أولًا
إذا قضيت سنوات في أكل قليل ودايتات متكررة، بالنسبة لي الخطوة الأولى مو إني أضغط عليك أكثر.
الخطوة الأولى إني أرجعك لمكان عندك فيه مساحة.
التغذية.
أرفع أكلك تدريجيًا، لأن جسمك يحتاج كمية كافية من الطعام والبروتين والدهون والفيتامينات والمعادن.
وأنا شخصيًا أشوف إن الشخص البالغ اللي عالق سنوات على 1000–1300 سعرة لازم يوقف ويسأل نفسه بجدية: هل هذا فعلًا مكان طبيعي أبغى أعيش فيه بقية حياتي؟
لأنك مو قاعد تحاول تنجو أسبوعين.
أنت تبغى تبني حياة كاملة.
تمارين المقاومة.
العضلات بالنسبة لك مو رفاهية.
أنت خسرت منها خلال الرحلة، وتحتاج تستعيد اللي تقدر عليه.
وكل ما بنيت عضلاتك، وتحركت أكثر، وصارت عندك طاقة أفضل، صار عندك أساس أفضل لخسارة الدهون بدل ما يكون الحل الوحيد إنك تقلل الأكل.
وبعدها، لما يكون عندك مجال تتحرك فيه، نبدأ نخسر الدهون.
مو وأنت أصلًا محشور في أقل كمية أكل قدرت توصل لها.
الصبر.
الشيء اللي تدمر خلال سنوات ما يرجع في أسبوعين.
وإذا أنت مكمم من سنوات وفي مرحلة خسارة دهون مستقرة، فأنا أفضل نزولًا تدريجيًا غالبًا حول نصف إلى كيلو بالأسبوع بدل إن كل همي أشوف أكبر رقم ممكن بأسرع وقت.
وإذا النزول صار أسرع بكثير، أنا أسأل:
إيش الشيء اللي قاعد أخسره مع الدهون؟
أنا أعرف إن المونجارو مغري.
لأنك تعبت، وطفشت، وتبغى تشوف الميزان يتحرك.
والإبرة ممكن فعلًا تخليه يتحرك.
لكن بالنسبة لي السؤال مو:
هل مونجارو بينزل وزني؟
السؤال:
إيش بيبقى لي بعد ما ينزل؟
استغل تكميمك، تكفى.
هذا برنامجي:
وهذي المنهجية اللي أستخدمها لإعادة بناء الأيض بعد التكميم:
