في الاستشارات اللي سويتها الشهر الماضي، تكرر قدامي نفس الموقف أكثر من مرة، وبنفس الكلام تقريبًا:
أكلها أقل من أكل كل اللي حولها، وهي الوحيدة اللي وزنها يزيد.
وهذي كلماتهم بالنص:
"بناتي أكلهم أكثر من أكلي، يحلّون وياكلون شبس ويشربون غازيات، وأوزانهم بالأربعين والخمسين."
"زوجي أكله غير، وعيالي مو زي أكلي أبدًا، ومع ذلك أجسامهم حلوة، وأنا الوحيدة اللي على طول أزيد."
"تاكل أكثر مني وتنزل. وقتها بديت أقول: ليش أنا بهالكمية القليلة ما فيه نزول؟"
والثلاث كلهم مكممات.
والثلاث كلهم أكلهم أقل من اللي حولهم.
والثلاث كلهم الوزن عندهم يا ثابت يا يزيد.
وش تقول لنفسك عادةً؟
أغلب الناس لما يشوفون هالمشهد يدورون له تفسير يريحهم.
"هم صغار، وأنا كبرت."
"هم يتحركون أكثر مني."
"جسمي كذا من زمان، وراثة."
وكلها تفسيرات تبدو منطقية.
لكن خلنا نختبرها وحدة وحدة. وأنت احكم بنفسك.
العمر؟
لا تقارن نفسك ببنتك اللي بالعشرين. قارن نفسك بشخص من عمرك، وزنه طبيعي، وأكله طبيعي.
غالبًا بتلقى إنه ياكل أكثر منك، وبنفس عمرك، ووزنه أقل.
صح إن العمر له أثر، لكنه أثر بسيط. ما يفسر إن شخص ياكل أقل بكثير من اللي حوله ويزيد وهم ما يزيدون.
الحركة؟
وحدة من الثلاث كانت تمشي ساعة كل يوم، وتنط، وتتمرن مقاومة في البيت. والوزن ثابت.
والحركة تفرق، ما أنكر. لكن اسأل نفسك بصراحة:
هل اللي حولك فعلًا يتحركون أضعاف حركتك؟
ولا هم عايشين يوم عادي، دوام وبيت وجلسة، ومع ذلك ياكلون أكثر منك ووزنهم ثابت؟
الوراثة؟
نفس هالجسم اللي تقول عنه "جسمي كذا" هو اللي نزل ٣٠ و٤٠ و٦٠ كيلو بعد التكميم.
يعني جسمك يعرف ينزل.
السؤال: وش تغير فيه من وقتها لين اليوم؟
السؤال اللي يكشف كل شي
في كل استشارة كنت أسأل نفس السؤال:
هل أكلك اليوم قريب من أكلك قبل العملية؟
ولا مرة سمعت "إيه".
الجواب كان دايمًا:
"ولا ربعه."
"أول كنت آكل أربع خمس صحون، الحين صحن واحد وما أقدر أزيد."
"قبل كنت آكل ساندويتشين شاورما، الحين ما أكمل نص."
فعندنا معلومتين أكيدتين:
١. أكلك اليوم ربع أكلك قبل العملية أو أقل.
٢. أكلك اليوم أقل من أكل اللي حولك.
ومع ذلك أنت اللي تزيد.
فوين المشكلة؟
المشكلة مو في كمية أكلك. المشكلة في قدرة جسمك على الحرق.
اللي حولك ياكلون أكثر منك، لأن أجسامهم تحرق أكثر منك.
وأنت تاكل أقل منهم ووزنك يزيد، أو ثابت بأفضل الأحوال، لأن جسمك ما عاد يحرق مثل أول.
وعشان تتأكد من هالفكرة، اسأل نفسك هالسؤال:
لو أختك أو زوجك أو ولدك أكل نفس كمية أكلك، كل يوم، لمدة شهر… وش بيصير له؟
وحدة من الثلاث سألتها نفس السؤال. ما فكرت ثانية وحدة، وقالت:
"بينسحب."
إيه، بينسحب. هذا الطبيعي.
جسم يحرق طبيعي، لو أكل أكلك، بينزل وزنه.
والسؤال الحقيقي هنا مو ليش وزنك يزيد. السؤال: ليش جسمك صار يزيد على أكل لو أكله غيرك بينحف؟
وهنا الغلطة اللي يسويها أغلبنا
لما تشوف هالفرق، أول شي تسويه إنك تقلل أكثر.
تقطع الحلا.
تقطع النشويات.
تصوم.
وبعضهم يروح للإبر.
لكن فكر فيها شوي.
الفرق بينك وبينهم أصلًا إن جسمهم يحرق أكثر.
فلما تقلل أكثر، أنت ما تقرّب المسافة. أنت توسعها.
لأن كل مرة تقلل، جسمك يتعلم يعيش على أقل، ويحرق أقل.
وبعد فترة، حتى الأكل الأقل يرجع يثبت أو يزيد.
وترجع لنفس السفرة، ونفس المشهد، بس صحنك أصغر من قبل.
طيب وش الحل؟
الحل إنك ترجع جسمك لمكان يحرق فيه مثل اللي حولك.
وقتها يصير عندك ميزة ما عندهم:
أنت مكمم.
يعني كميتك الطبيعية أقل منهم من الأساس.
فلو جسمك يحرق طبيعي، وأنت تاكل أقل منهم بحكم العملية، وش بيصير؟
بتنزل وأنت مرتاح، وبتحافظ وأنت مرتاح.
وهذا بالضبط اللي كان المفروض يصير من يوم سويت العملية.
الطريق لهذا المكان هو إعادة بناء الأيض بعد التكميم، وهذا الشي اللي شرحته بالتفصيل في موقعي ومقاطعي.
