أنت بدون شك من قبل العملية ومن بعدها تسمع نصايح الكارديو والمشي وأهميتها لنزول الوزن.
وبعد العملية تسمعها أكثر.
إذا وقف وزنك؟
زود الكارديو.
وغالبًا ثاني شيء يسألك عنه طبيبك بعد ما يتأكد إن أكلك قليل وإنك ما تحلي:
كم تمشي؟ وكم تسوي كارديو؟
وأنت لو فعلًا بدأت بالكارديو، ممكن في البداية تشوف نتيجة وينزل وزنك.
لكن بعد فترة قصيرة يبدأ جسمك يدخل في مرحلة مختلفة تمامًا.
الجوع يصير أقوى.
الطاقة تقل.
والميزان يبدأ يوقف أو يتحرك بصعوبة شديدة.
وهنا غالبًا تقول:
جسمي ما يتعاون.
أو:
الدهون عندي عنيدة.
بينما الحقيقة إن جسمك فقط قاعد يتكيف مع الأسلوب اللي أنت ماشي عليه.
إيش اللي يصير بالضبط؟
معدل الحرق أو الأيض هو كمية السعرات اللي يحرقها جسمك خلال اليوم، سواء بالحركة أو الراحة أو حتى النوم.
وهذا المعدل يتأثر بطريقة أكلك وبنوع الجهد اللي تسويه.
لما تقلل السعرات لفترة طويلة، وفوق هذا تمارس كارديو بشكل مجهد ومستمر، جسمك يتعامل مع الوضع كأنه نقص غذائي طويل وضغط مستمر على الطاقة.
ويبدأ يدخل في وضعية توفير.
أول شيء يبدأ يقلل صرف الطاقة.
يصير جسمك أكثر كفاءة باستخدام الكمية القليلة اللي تعطيه إياها.
وبدل ما يصرف مثل أول، يبدأ يصرف أقل.
وبعدها تبدأ مشكلة ثانية أهم:
العضلات.
العضلات أنسجة تستهلك طاقة.
ولما أنت طول الوقت في أكل قليل، ومع جهد طويل مثل الكارديو، وما عندك سبب قوي يخلي جسمك يتمسك بالعضلات، تبدأ تخسرها.
ومع خسارة العضلات ينخفض صرفك أكثر.
وهكذا تدخل في دائرة:
تأكل أقل.
تسوي كارديو أكثر.
وزنك ينزل فترة.
جسمك يتكيف.
صرفك يقل.
عضلاتك تقل.
ثم تحتاج تضغط أكثر عشان تشوف نفس النتيجة.
وهنا توصل للمرحلة اللي كثير من المكممين عالقين فيها:
أكل قليل، حركة كثيرة، والنتيجة أقل وأقل.
الكارديو يطلب من جسمك التحمّل
الكارديو المجهد والمستمر يعلّم جسمك إن المطلوب منه هو التحمّل لفترات طويلة.
مو القوة.
وجسمك يبدأ يتكيف مع هذا الشيء.
يصير هدفه إنه يقدر يكمل نفس الجهد بأقل طاقة ممكنة.
لكن إذا هدفك إنك تحافظ على عضلاتك، ترفع قدرتك الأيضية وتحسن شكل جسمك، هنا الكارديو المجهد والمستمر مو خيارك.
خصوصًا وأنت مكمم وأكلك أصلًا قليل مقارنة بالشخص العادي.
هنا يجي دور الحديد
تمارين الحديد أو المقاومة تعطي جسمك رسالة مختلفة تمامًا:
أنا محتاج هذه العضلات.
لما ترفع أوزان وتطلب من عضلاتك تنتج قوة، جسمك يصير عنده سبب يحافظ عليها ويبنيها بدل ما يتخلص منها.
ومع بناء واستعادة العضلات، أنت تبدأ ترجع الشيء اللي فقدته خلال رحلة النزول.
وهنا بالنسبة لي الحديد مو مجرد تمرين عشان الشكل.
الحديد جزء أساسي من إصلاح قدرتك الأيضية.
ومع رفع الأكل بشكل تدريجي ومدروس وتمارين المقاومة، تبدأ تطلع من مرحلة الاستنزاف اللي كنت عايش فيها.
طاقتك تتحسن.
قدرتك على التمرين تتحسن.
الجوع يصير أهدأ.
ويصير عندك هامش طاقة أكبر تتحرك فيه بدل ما يكون الحل الوحيد كل مرة:
قلل أكثر وسو كارديو أكثر.
وحتى لو ما يهمك العضل أصلًا
وهنا نقطة مهمة جدًا.
يمكن تقول:
أنا ما يهمني أبني عضل.
ولا يهمني شكلي.
أنا هدفي الوحيد أخسر الدهون.
حتى لو هذا هدفك فقط...
أهم تمرين هو الحديد.
لأن العضلات مو بس عشان الشكل.
هي جزء من قدرتك الأيضية.
وكل ما خسرت عضلات أكثر وأنت تنحف، أنت قاعد تخسر جزء من الشيء اللي يساعد جسمك يصرف طاقة.
فحتى لو هدفك الوحيد هو خسارة الدهون...
تمرن حديد.
