كثير من المكممين بعد أول سنة أو سنتين يلاحظون إن كمية أكلهم زادت.
ويصير تركيزهم على الكمية أكبر، خصوصًا لو كان معها زيادة في الوزن.
وهذا منطقي.
لأنك فعلًا في أول أشهر بعد التكميم كنت تأكل كميات أقل بكثير، وفي نفس الوقت وزنك كان ينزل بسرعة.
فطبيعي جدًا تربط بين الاثنين وتقول:
لما كانت كميتي قليلة، وزني كان ينزل. ولما زادت الكمية، وزني بدأ يرجع.
إذًا المشكلة أكيد في كمية الأكل.
لكن خلنا نغير المقارنة شوي.
بدل ما تقارن أكلك اليوم بأكلك في أول أشهر بعد التكميم، أو تقارنه بمكمم ثاني...
قارنه بأكلك في آخر سنة قبل العملية.
قبل العملية، لما كان وزنك يزيد، هل كانت كمية أكلك فعلًا كبيرة؟
غالبًا نعم.
طيب اليوم؟
وزنك ممكن يكون قاعد يزيد، لكن كمية أكلك ما هي كبيرة بالشكل اللي تتخيله.
بل أحيانًا تكون كمية عادية جدًا بالنسبة لشخص بنفس وزنك وطولك.
عادية بالنسبة لجسمك، مو بالنسبة لفكرة إنك "مكمم".
لأن بالنهاية جسمك ما يدري إنك مكمم.
هو يتعامل مع كمية الطاقة اللي تدخل، وكمية الطاقة اللي يصرفها.
وهنا يبدأ السؤال الأهم:
إذا كمية الأكل مو هي المشكلة الأساسية، أجل وين المشكلة؟
المشكلة غالبًا في قدرتك الأيضية.
وببساطة أكثر:
في حرقك.
كل ما كان الشخص ملتزم على نصائح التقليل والحذف والكارديو فقط، كل ما تأثرت قدرته الأيضية وحجم عضلاته وصرفه اليومي من السعرات "حرقه".
وهنا تبدأ المشكلة الحقيقية.
لأنك لما ترجع بعد فترة وتأكل كمية طبيعية، يبدأ وزنك يزيد.
فتشوف الزيادة وتطلع باستنتاج يبدو منطقي جدًا:
الأكل الطبيعي هو المشكلة، والكميات القليلة اللي كنت آكلها هي الحل.
وهنا ترجع مرة ثانية لنفس الشيء اللي وصلك لهذا المكان من الأساس:
تقلل أكثر.
لكن تدري وش اللي يكشف المشكلة فعلًا؟
نفس كمية الأكل اللي اليوم قاعدة تزيدك دهون...
لو أكلها شخص ثاني بنفس وزنك وطولك، لكن قدرته الأيضية طبيعية، بتخليه يخسر دهون بشكل واضح.
نفس الأكل. نفس الكمية. نفس الوزن والطول.
لكن الفرق في كمية الطاقة اللي يقدر الجسم يصرفها.
فهل فعلًا كمية أكلك هي المشكلة؟
غالبًا لا.
