أسوأ شعور ممكن يمر فيه المكمم إن وزنه يبدأ يزيد بعد العملية.
وطبيعي جدًا إن أول شيء تسويه وقتها إنك تستعجل وتدور على حل.
دايت جديد.
رياضة.
إبر.
لكن هنا أكبر مشكلة.
أنت قاعد تدور على الحل قبل ما تعرف أصلًا إيش المشكلة.
ومهما كنت مستعجل على نزول الوزن، أول خطوة لازم تسويها مو إنك تجرب حل جديد.
أول خطوة إنك تعرف السبب، وما تفترضه.
لأن نفس المشكلة الظاهرية: "وزني زاد" أو "وزني ثابت" ممكن يكون وراها أسباب مختلفة تمامًا.
وهذي ثلاثة أمثلة من الاستشارات توضح لك قصدي.
نجات، 52 سنة، مكممة من خمس سنين
المشكلة اللي كانت تحاول تحلها: لما بدأ وزنها يزيد كان رد فعلها الطبيعي إنها تدخل في دايت وتحاول تقلل أكثر.
المشكلة الفعلية: لما راجعت حالتها، اكتشفنا إن الحديد عندها كان 3، وفيتامين B12 حوالي 150، وفيتامين D حوالي 20، تنام تقريبًا 4 ساعات فقط، وهضمها سيئ، ومعظم يومها خمول وجلوس. والأغرب إنها كانت متعايشة مع كل هذا وتحسب إنه طبيعي.
النتيجة: بدل ما نبدأ بدايت جديد، بدأنا نصلح وضعها. تحسن نومها، عالجنا النواقص، تحسن الهضم، تحسنت طاقتها، وصارت تتقبل الطعام بشكل أفضل وتأكل أكثر.
وزنها بدأ ينزل قبل ما نبدأ أصلًا.
وليد، 33 سنة، مكمم من أربع سنين
المشكلة اللي كان يحاول يحلها: وليد جاء للاستشارة وهو شبه مقتنع إن الحل له هو الإبر. كان يقول: أنا أكلي كثير. وكان يفكر إن الحل ببساطة إنه يحتاج شيء يخليه يأكل أقل.
المشكلة الفعلية: لما أخذنا تفاصيل يومه وأكله، اكتشفنا العكس تمامًا.
هو أصلًا كان يأكل أقل من اللازم.
يعني المشكلة اللي كان ناوي يعالجها بالإبر ما كانت موجودة أصلًا.
النتيجة: بدل ما نخليه يقلل أكثر، كان الحل إنه يزيد أكله، يغذي جسمه بشكل أفضل، ويصبر على استعادة الوضع الطبيعي.
وفعلًا مع الوقت بدأ وزنه ينزل وهو ياكل أكثر.
أمل، 29 سنة، مكممة من سنتين
المشكلة اللي كانت تحاول تحلها: وزنها 55 كيلو وطولها 158 سم، وجاية تبغى دايت عشان تنحف أكثر لأنها تشوف إن جسمها لسه فيه دهون كثيرة.
المشكلة الفعلية: هنا المشكلة مو الوزن. هي أصلًا وصلت لوزن طبيعي.
المشكلة إن عندها عضلات قليلة جدًا بسبب النحف الخطأ ونسبة الدهون أعلى من اللي تبغاه شكلًا.
فلو دخلت دايت قاسي زي كل مرة، ممكن تنزل الرقم أكثر وتخسر عضلات أكثر، وتطلع بشكل أسوأ رغم إن وزنها أقل.
النتيجة: الحل هنا مو مطاردة 50 أو 48 كيلو.
الحل إنها تبني عضل، تأكل بشكل كافي، وتخسر دهون مع الحفاظ على وزن قريب من 55.
الثلاثة كلهم جايين بسبب واحد ظاهريًا:
وزني مو عاجبني.
لكن لو أعطيت الثلاثة نفس الحل، فأنت غالبًا بتضر اثنين منهم على الأقل.
عشان كذا قبل ما تسأل:
إيش الحل؟
اسأل:
إيش المشكلة أصلًا؟
وإذا وزنك رجع أو ثبت بعد التكميم، وأنت مو عارف ليش، تقدر تحجز استشارتك ونحدد السبب قبل ما تبدأ تجرب حل جديد.
